Dövlət Komitəsi: qadınaşiddətəson həştəqi ilə başladılan aksiyanı dəstəkləyirik

“Ailə, Qadın və Uşaq Problemləri üzrə Dövlət Komitəsi son günlər sosial şəbəkələrdə #qadınaşiddətəson həştəqi ilə başladılan aksiyanı dəstəkləyir və bunu təqdirəlayiq hesab edir”.

Bunu açıqlamasında Dövlət Komitəsinin İnformasiya və analitik araşdırmalar şöbəsinin müdiri Elgün Səfərov deyib.

Onun sözlərinə görə, Komitə bundan əvvəl də bu kimi kampaniyalara dəstək olub: “Biz bu aksiyaya dəstək veririk. Azərbaycan qadını hər zaman aparıcı qüvvə olub. Ona görə də hər kəs birdəfəlik beyninə həkk eləməlidir ki, qadına qarşı zorakılıq cinayətdir. Bu, qanun pozuntusudur, insan hüquqlarının pozulması deməkdir. Bu, bir aksiomadır və bunun bir fakt kimi cinayət işi olduğu hər kəs tərəfindən qəbul edilməlidir. Bu cinayəti törədənlər də məsuliyyətə cəlb olunmalıdır”.

E.Səfərov bu günlərdə qadınların zorakılığa məruz qalması hallarının aktuallaşdığını bildirib: “Məişət zəminində qadına qarşı zorakılığın forması ildən-ilə daha da qəddarlaşır. Təəsüflər olsun ki, cəmiyyətdə zorakılığı normal yanaşma kimi qəbul edənlər var və son vaxtlar bu kimi hadisələrə təəccüblənmirlər. Eyni zamanda küçədə zorakılığa məruz qalaraq bıçaqlanan qadına kömək etmək əvəzinə onu videolentə alırlar. Zorakılığa yanaşma da psixoloji məsələlərdən irəli gəlir. Qadına cəmiyyətdə münasibət dəyişməlidir. Qadın anadır, bacıdır, qızımızdır”.

Şöbə müdiri vurğulayıb ki, nikaha məcburi daxil edilmə halı da məişət zorakılığının bir növüdür: “Buradan bir sual ünvanlamaq istəyirəm ki, indiyə qədər övladını məcburi nikaha daxiletmə faktına görə hansısa valideyn azadlıqdan məhrum edilibmi? Təəssüflər olsun ki, bununla bağlı bir dənə də olsa, cinayət işi yoxdur. Ona görə də il ərzində məişət zorakılığı ilə bağlı 900-ə yaxın cinayət və inzibati iş olur. Son 7 il ərzində məişət zorakılığına məruz qalma faktı ilə bağlı 900-dək cinayət işi qeydə alınıb. Zorakılıq faktlarının 86 faizi qadına və qız uşaqlarına qarşıdır. Hesab edirəm ki, dövlət qurumları da bununla bağlı ciddi məşğul olmalıdır. Biz də bu istiqamətdə fəaliyyətimizi mütəmadi olaraq davam etdiririk”.