Elm adamı: 5-10 ildən sonra insan orqanlarının çapı mümkün olacaq

Bioçapın yaxın gələcəkdə yayğınlaşacağı bildirilir

 Canlı orqanik hüceyrələrin süni formada istehsalı bugünün reallığına çevrilməyə başlayır. Bu sahədə dünyanın tanınmış mütəxəssislərindən biri olan Leybnis adına Hannover Universitetinin elm adamı Boris Çiçkov lazer bioçapı sahəsində hazırda gedən proseslərdən danışıb.

Çiçkovun sözlərinə görə, lazer bioçapında təkamül çox sürətlə gedir, ona görə də yaxın gələcəkdə onun işinin daha da genişlənməsi və yayğınlaşması ehtimalı böyükdür.

"Mənim fikrimcə, ən vacib məsələ budur ki, bu texnologiya insan orqanlarını yaratmağa və onların transplantasiyası zamanı riskləri azaldtmağa imkan verəcək. Əgər hazırkı tendensiya davam etsə, qarşıdakı 5-10 ildə biz uğurla çap edilmiş və yaradılmış orqanlar barədə eşidəcəyik. Həmçinin dəri çap etmək, kosmetik preparatların və bir digər bir çox şeylərin sınağı üçün nümunələr yaratmaq mümkün olacaq", - Çiçkov açıqlamasında deyib.

Onun bildirdiyinə görə, hazırda elm adamları dəri, qığırdaq, ürək, ciyər, böyrək üçün müxtəlif hüceyrələr çap edə bilirlər: "Dünyada indi bu istiqamətdə işlər görən çoxlu elmi mərkəzlər var. Həkimlər müasir tibbin bütün tapşırıqlarını təkbaşına həll etmək məcburiyyətində deyillər, bioloqlar, fiziklər, kimyaçılar, mühəndislər bir yerdə işləməlidirlər, uğurun sirri də bundadır".

"Təsəvvür edin avtomobiliniz üçün necə ehtiyat hissə alırsınızsa, özünüz üçün də gedib elə hissə ala bilərsiniz. Başlanğıcda bu əlbəttə, bahalı olacaq, amma zaman keçdikcə, vəziyyət dəyişəcək. Bundan başqa, texnologiya tamamilə zərərsizdir. Düşünürəm ki, bioprintinqin böyük gələcəyi var - məsələn, internet bizim həyatımızda necə nəhəng dəyişikliklər yaradıbsa, bu texnologiyanın da gəlməsi və bizim həyatımıza güclü şəkildə təsir etməsi mütləqdir", - deyə elm adamı fikrini tamamlayıb.