Alimlər Mona Liza ilə bağlı məşhur iddianın yalan olduğunu aşkar edib

"Mona Liza" rəsmi "Mona Liza effekti" doğurmur

Leonardo da Vinçinin "Mona Liza" rəsmi iki şeyə görə məşhurdur: sirli gülümsəməsinə və inadkar baxışına görə. Çox zaman belə inanc olub ki, Mona Liza otaqda daim öz tamaşaçılarını güdür, harada dayanmağından asılı olmayaraq, daim birbaşa sənə baxır.

Məhz buna görə də "La Giaconda" adıyla da tanınan bu əfsanəvi rəsm əsəri "Mona Liza effekti" deyilən elmi fenomenin adının ortaya çıxmasına səbəb olub. "Mona Liza effekti"nin açması budur ki, rəsmdəki subyekt harada dayanmağından asılı olmayaraq daim sənə baxır.

Amma Almaniyanın Bielefeld Universitetinin apardığı tədqiqat nəticəsində müəyyən olunub ki, "Mona Liza" rəsmi əslində, "Mona Liza effekti" doğurmur. Bu barədə tədqiqat işi "i-Perception" jurnalında dərc olunub.

"Mona Liza effekti"nin həqiqi olub-olmadığını müəyyən etməkdən ötrü Bielefeld Universiyeyinin professoru və tədqiqatın aparıcı müəllifi Gernot Horstmann 24 iştirakçı ilə Mona Lizanın baxışını ölçmək üçün sınaq həyata keçirib. Kompüter texnologiyası ilə həyata keçirilən sınaq nəticəsində müəyyən olunub ki, faktiki olaraq, rəsmdəki subyekt əslində tamaşaçının 15,4 dərəcə sağına, onun sağ qulağına, ya da çiynindən biraz yuxarı nöqtəyə baxır. Qısacası, Mona Liza mütləq şəkildə öz auditoriyasına baxmır.

"Mona Liza effektinin olmasına dair şübhə yoxdur", - Hortsmann açıqlamasında deyib: "amma bu "Mona Liza"nın özündə baş vermir".