Günəş enerjisində inqilabi yenilik: neft və qaz dövrü tezliklə başa çata bilər

Bill Qeytsin dəstəklədiyi məxfi startapın məqsədi planeti xilas etməkdir

Təmiz enerji şirkəti olan "Heliogen" bəyan edib ki, Günəş şüasını əks etdirməklə 1000 Selsi dərəcədən çox istilik əldə etməyə imkan verən texnologiyanı yaratmağa müvəffəq olub. Bu maksimum temperaturu əldə etmək süni intellekt və güzgülü sahədən yararlanmaqla mümkün olub.

Əsas etibarilə "Heliogen" günəş sobasını inkişaf etdirməyə müvəffəq olub, belə ki, bu soba Günəş səthində mövcud olan istiliyin təxminən dörddə birini yaratmaq iqtidarındadır.

Günəş enerjisindəki inqilabi yenilik konkret olaraq bu mənaya gəlir: ilk dəfə olaraq günəş enerjisindən beton, polad, şüşənin yaradılması və digər sənaye proseslərinin həyat keçirilməsi üçün lazım olan ifrat istiliyi əldə etmək mümkün olacaq. Başqa sözlə desək, tərkibində karbon olmayan günəş şüası böyük karbon emissiyasına əsaslanan sənayelərdə neft, qaz və daş kömürdən ibarət fossil yanacaqlarından istifadəni əvəzləmək iqtidarındadır. İndiyəcən təmiz enerji sahəsində bu dərəcədə temperatur əldə olunmamışdı.

"Biz fossil yanacağının qiymətinə zərbə vuracaq və CO2 emissiyalarının qiymətlərini aşağı salacaq texnologiyanı yaymağa hazırlaşırıq", - "Heliogen"in təsisçisi və CEO-su Bill Qross "CNN"ə açıqlamasında deyib.

"Heliogen" şirkətini məşhur milyarder Bill Qeytsin dəstəklədiyi bildirilir. Milyarder Patrik Soon-Şionqun da dəstək verdiyi layihənin sənayədə istixana qazlarını dramatik şəkildə azaldacağı bildirilir.