Dünyada ən geniş yayılan dillər - Rusdillilər kəskin azalıb - STATİSTİKA

Dünyada rus dilini öyrənənlər və rusdilli insanların sayı kəskin azalmaqda davam edir.

Ölkənin Təhsil Nazirliyinin hesablamalarına görə, 2018-ci ildə dünyada rus dilinin daşıyıcıları Sovet İttifaqının dağıldığı 1991-ci illə müqayisədə 2 dəfə azalıb.

Belə ki, əgər 1990-cı illərin əvvəllərində rus dilini öyrənənlərin sayı 74,6 milyon idisə, 2004-cü ildə bu rəqəm 51,2 milyona, 2018-ci ildə isə 38,2 milyon nəfərə qədər geriləyib.

Keçmiş sovet respublikalarını istisna etməklə isə rus dilini öyrənənlərin sayı 20 milyondan 1 milyon nəfər qədər geriləyib.

Geriləmə postsovet məkanında da özünü göstərib. Belə ki, rus dilində danışanların sayı bu ölkələrdə 119,5 milyon nəfərdən 82,5 milyon nəfərə qədər azalıb.

Buna baxmayaraq, rus dili dünyada ən geniş yayılmış 10-cu dil hesab olunur. Bu dildə 235 milyon insan danışır.

Dünyada ən geniş yayılmış dil ingilis (1,5 milyard daşıyıcı) hesab olunur. Növbəti pillələrdə Çin dili (1,4 milyard daşıyıcı), hind dili (650 milyon daşıyıcı), ispan dili (521 milyon daşıyıcı), ərəb dili (370 milyon daşıyıcı), İndoneziya dili (292 milyon daşıyıcı), fransız dili (280 milyon daşıyıcı), portuqal dili (265 milyon daşıyıcı), benqal dili (263 milyon daşıyıcı) yer alıb.