Almaniyada ixtisaslı işçi böhranı: Merkel xaricdən mütəxəssislər gətirmək istəyir

Angela Merkel işçi qıtlığının biznesin köçünə səbəb olacağına dair xəbərdarlıq edib

Almaniya şirkətlərin xaricə köçünün qarşısını almaq üçün Avropa Birliyinin xaricindən ixtisaslı işçilər rekruit etmək istəyir. Berlin bu boşluğu doldurmaq üçün gözünü Meksika, Vyetnam və Hindistan kimi ölkələrə dikib.

Bu barədə danışan ölkə kansleri Angela Merkel ixtisaslı işçi qıtlığının şirkətlərin xaricə köç etməsinə səbəb olacağına dair xəbərdarlıq edib.

"Biz bir çox sektor və bizneslərin ixtisaslı işçi axtardığını bilirik", - Merkel deyib: "Kifayət qədər ixtisaslı işçi olmadan biznesin yerləşməsi uğurlu ola bilməz. Buna görə də bizim üçün lazım olan saydakı mütəxəssisləri ölkəyə cəlb etmək vacibdir. Yoxsa, şirkətlər miqrasiya edəcəklər və biz əlbəttə, bunu istəmirik".

Avropa Birliyi ölkələrindən 2.5 milyon insan Almaniyada işləyir. Bu barədə danışan Merkel bildirib ki, bu kifayət deyil: "Buna görə də AB-dən kənarda da ixtisaslı işçilər axtarmalıyıq".

Almaniyad artıq bu məsələ ilə bağlı mühüm qərarlar verib. 2020-ci ilin martın 1-dən etibarən ölkədə İxtisaslı İşçilərin İmmiqrasiya Aktı qüvvəyə minəcək. Məqsəd qeyri-AB ölkələrindən olan ixtisaslı işçilərin Almaniyaya gəlməsi prosesini asanlaşdırmaqdır.