Mesut Özil PES 2020-nin Çində satılan versiyasından çıxarılıb

Özilin uyğurları dəstəkləyən mesajı Çində qəzəb dalğası yaradıb.

 "Arsenal" futbol komandasının türk əsilli futbolçusu Mesut Özil dünyanın ən populyar video oyunlarından PES 2020-nin Çində satılan versiyasından çıxarılıb. Buna səbəb futbolçunun bir müddət əvvəl sosial şəbəkədə uyğur müsəlmanlarını dəstəkləyən mesaj yazmasıdır.

PES-in Çindəki paylaşımını həyata keçirən "NetEase" şirkəti məsələ ilə əlaqədar açıqlama verib: "Alman futbolçu Özil sosial mediada Çinlə bağlı radikal açıqlama verib. Bu sözlər çinli futbol həvəskarlarının hisslərinə toxunub, idmanın sevgi və sülh ruhuna xələl gətirib. Bunu başa düşmürük, qəbul etmirik və bağışlamırıq".

Türk əsilli alman futbolçu yaydığı mesajda uyğur türklərini "əziyyətlərə qatlaşan mücahidlər" kimi xarakterizə etmiş və "Quranlar yandırılır, məscidər bağlanır, din alimləri öldürülür, bacılar zorla çinli kişilərlə evləndirilir. Bütün bunlara baxmayaraq, Ümməti Məhəmməd susqundur" demişdi.

Özilin bu mesajı "Arsenal"ın çox populyar olduğu Çində qəzəb dalğası yaradıb.

"Arsenal"ın oyunu Çinin dövlət televiziyasının proqramından çıxarılıb.

"Arsenal" futbol klubu isə paylaşımın "Özilin şəxsi rəyi" olduğunu bildirib.