Qadın 25 il ərzində təkbaşına 2 milyon ağac əkib

Anasuyamaya ana təbiətə verdiyi töhfələrə görə UNESCO mükafatı verilib

Hindistanın Postapur kəndində yaşayan Çilkapalli Anasuyama adlı bir qadın ömrünün 25 ilini 22 kənddə 2 milyon ağac əkməyə həsr edib. Bu töhfəsinə görə, o, yaxınlarda Nyu-York şəhərində UNESCO-nun mükafatına layiq görülüb.

Hindistan mətbuatına açıqlama verən qadın məsələ ilə əlaqədar bu sözləri deyib: "Bu mənim üçün ağlasığmaz təcrübədir. Heç vaxt təsəvvürümə gətirməzdim ki, mənim kimi bir qız belə bir prestijli mükafata layiq görülər. Gördüyü işə görə belə yüksək səviyyədə qiymətləndirilər və həvəsləndirilər. Mən hələ də təbrik mesajları alıram və indi mənim işimlə maraqlanan insanların sayı daha da artıb".

Çilkapalli Anasuyama özünü bu işə 25 yaşında olarkən ərinin ölümündən sonra həsr edib. Dul qalan, yetərincə təhsilə və maliyyəyə sahib olmayan qadın çıxış yolunu bir təsərrüfat proqramına yazılmaqla görüb. Burada ona ağac əkməyi öyrədiblər, ağac əkmək işi qadının o qədər xoşuna gəlib ki, bundan sonra o, könüllü surətdə ağac əkməyə başlayıb və beləliklə, 25 il ərzində 22 kənddə 2 milyon ağac əkib.

Çilkapalli Anasuyama bundan sonra da ağac əkmək işini davam etdirmək niyyətindədir.