Rusiya qlobal istiləşmənin üstünlüklərindən yararlanacaq

Putin qlobal istiləşməyə insan fəaliyyətinin səbəb olduğu tezisini rədd edir.

 Rusiya hökuməti iqtisadiyyat və əhalisini iqlim dəyişikliyinə uyğunlaşdırmaq üçün fəaliyyət planı açıqlayıb. 30 maddədən ibarət planda hərarətin artmasının "üstünlüklərindən yararlanmaq" maddəsi də var.

Hökumətin rəsmi saytında yayımlanan fəaliyyət planında iqlim dəyişikliyinin Rusiyanın sosial-iqtisadi inkişafına, insan həyatına, səhiyyə və sənayesinə ciddi təsir göstərdiyi etiraf edilir.

Planın iki ili əhatə edən ilk mərhələsində yeni anbarların inşa edilməsi, quraqlığa davamlı məhsullara keçilməsi, hansısa fəlakət şəraitində peyvənd və təxliyyə əməliyyatları üçün hazırlıqların görülməsi nəzərdə tutulub. Planda iqlim dəyişikliyinin ictimai sağlamlığa risk törətdiyi, buzlaq torpaq təbəqələrini təhdid etdiyi, təbii fəlakət və infeksiya ehtimalını artırdığı bildirilib. Həmçinin qlobal istiləşmə səbəbində bəzi canlı növlərinin yox ola biləcəyi vurğulanıb.

Rusiya prezidendi Vladimir Putin qlobal istiləşməyə insan fəaliyyətinin səbəb olduğu tezisini rədd edir. Amma Rusiya qlobal istiləşmədən ən çox təsirlənən ölkələr arasındadır.

Qeydlərin aparılmağa başladığı 1891-ci ildən bu yana 2019-cu il Rusiyadakı ən isti il olub.