Avstraliya yanğınları: Külə çevrilən ərazilərdə bitkilər yenidən çiçəkləməyə başlayıb

Avstraliya tarixin ən pis yanğınlarından biriylə mübarizəni davam etdirir

Avstraliyada sentyabrdan bəri davam edən yanğınlarda yarım milyard heyvan tələf olub və milyonlarla hektarlıq ərazilərdəki bitki örtüyü məhv olub.

Amma külə çevrilən bəzi ərazilərdə bitkilərin yenidən çiçəkləməyə başlaması həyatın geri qayıtmağa başladığını göstərir.

Fotoqraf Murrey Lav yanğınların ən güclü olduğu Yeni Cənubi Uelsdəki Kulnura şəhəri yaxınlarındakı zərəri lentə almaq üçün çəkilişlər apararkən, küllərin arasından bitkilərin yenidən çıxdığına şahid olub.

Lav kül olan ərazidə gəzərkən gördüyü mənzərini "tamamilə məhv" kimi xarakterizə edib, amma bitkilərin yenidən çıxmağa başlamasının öna ümid verdiyini dilə gətirib.

"Bu axtardığımız, görmək istədiyimi yenilənmənin əlamətidir. Avstraliyanın məşhur meşələrinin yenidən doğmasına şahid oluruq", - Lav deyib.

Lavın sosial şəbəkədə yerləşdirdiyi şəkillər böyük marağa səbəb olub.

Şeffild Universitetinin yanğın ekologiya mütəxəssisi Dr. Kimberli Simpson kül olan ərazilərdə bitkilərin yenidən çıxmasının normal olduğunu deyir.

Simpsonun dediyinə görə, bu bitki növləri milyonlarla il ərzində tez-tez yanğınlara məruz qalıb və bunun nəticəsində də yanğından sonra tez bir şəkildə həyata qayıtmalarını təmin edəcək şəkildə təkamül ediblər.

Bununla belə, mütəxəssis normal şərtlər altında yanğınların nadir olduğu yağış meşələri kimi sahələrdə belə bir təkamülün mövcud olmadığını və bu səbəbdən də buradakı bitkilərin həyata qayıtmasının bu qədər sürətli olmaq ehtimalının olmadığını bildirib.