Elektron siqaret heç də ziyansız deyil – ilk ölüm faktı qeydə alındı

Amerika Birləşmiş Ştatlarında (ABŞ) elektron siqaret istifadə edənlərdə yay aylarında ortaya çıxan sirrli ağciyər xəstəliyi ilə bağlı ilk dəfə bir adam həyatını itirib.

 Bu barədə İllinois Xalq Sağlamlığı İdarəsindən məlumat verilib.

Bildirilib ki, İllinois ştatında ağciyər narahatlığı ilə bağlı xəstəxanaya aparılan bir adam ölüb. Eyni səbəbdən xəstəxanaya 22 nəfər gətirilib. 12 nəfərin müalicəsi hələ davam edir.

17-38 yaş arasında olan bu xəstələr hava çatışmazlığı, nəfəs kəsilməsi və sinə ağrıları ilə xəstəxanaya yerləşdiriliblər. Qusma, ishal və əldəndüşmə kimi həzm sistemilə bağlı şikayətlərlə də xəstəxanaya müraciət edənlər olub.

“Semptomların təkcə bir xəstəliklə bağlı olub-olmadığı dəqiqləşməyib. ABŞ Xəstəliyə Nəzarət və Qorunma Mərkəzi mütəxəssisləri hadisəni araşdırmaq üçün avqustun 21-də İllinoisə gəliblər”, - deyə İllinois Xalq Sağlamlığı İdarəsinin direktoru Nqozi Ezike bilirib.

N.Ezike əlavə edib ki, ümumilikdə, 28 iyun-20 avqust tarixlərində ölkə daxilində 16 ştatda elektron siqaret istifadə edən 153 nəfər ağciyər narahatlığı şikayətiylə sağlıq mərkəzlərinə müraciət edib.

ABŞ Səhiyyə Nazirliyi 2018-ci ilin dekabrında verdiyi hesabatda ölkədə 2017-2018-ci illərdə orta məktəb şagirdləri arasında elektron siqaret cihazlarının istifadəsinin 78 faiz artdığın bildirmişdi. Bu gənclərin 27 faizi fasiləsiz elektron siqaret istifadə edənlərdir.

Qeyd edək ki, bu yaxınlarda ABŞ-ın Stanford Universitetinin Tibb fakültəsinin professoru Cozep Vunun rəhbərliyi ilə elektron siqaretlərlə bağlı araşdırma aparılıb. Məlum olub ki, elektron siqaretlər ənənəvi siqaretlərin təhlükəsiz alternativi deyil.

Mütəxəssislərə görə, ənənəvi siqaret çəkən zaman insan nə qədər tütün qəbul etdiyini bilir. Ancaq elektron siqaretlər aldadıcı ola bilir. Çox qısa müddətdə insan fərqinə varmadan böyük miqdarda nikotin qəbul edə bilər.