Heyvanlar zəlzələni öncədən hiss edə bilərmi? – Elm cavab verdi

İllərdir zəlzələlərlə bağlı insanlar arasında bəzi inanclar formalaşıb: deyirlər ki, heyvanlar zəlzələni öncədən hiss edə bilir. Bəs görəsən bu fikrin təməlində nə dayanır? Həqiqətən, heyvanlar zəlzələni əvvəlcədən hiss edə bilərmi? Yoxsa, bu fikir əsası olmayan bir inancdır? Bu suallar qarşısında elmin nə cavab verdiyinə nəzər salaq.

 United States Geological Survey (USGS) – ABŞ Geoloji Tədqiqatlar Qurumu zəlzələdən öncə ilanların və quşların qəribə davranışları ilə bağlı bir çox faktın qeydə alındığını vurğulayır.

Qurumun internet saytındakı məqalədə bənzər faktın ortaya çıxmasının eramızdan əvvəl 373-cü ilə qədər uzandığı bildirilir.

Elm adamlarının bu mövzuda çoxsaylı araşdırmalar apardığını vurğulayan qurum, belə bir əlaqənin hələ elmi cəhətdən sübut olunmadığını söyləyir.

Eyni yazıda, zəlzələdən yayılan dalğaların heyvanlar tərəfindən insanlardan qabaq hiss edilməsinin heyvanların zəlzələdən bir neçə saniyə əvvəl qəribə davranışlar sərgiləməsinə səbəb olduğu bildirilir.

Ancaq bu, zəlzələni əvvəlcədən hiss etmək anlamına gəlmir. Heyvanlar başlamaqda olan zəlzələni insanlardan qabaq qavrayır və buna görə də, bir neçə saniyə əvvəlcədən reaksiya verirlər.